Jux und Dollerei

Beim Manes Knötterkopp es der Name Programm. Dat es et ävver noch nit all! Hä es och ene Knieskopp un vör allem ene Blötschkopp, wann et öm de Fraulück geiht.

 

Doröm hät hä et Dolores Rothschild engageet. Dat hät sich spezialiseet op "Arrangements geselliger Begegnungen - zwecks Eheschließung". Dolores hät e Hätz us Gold ävver em Büggel och alles, wat mer för ze Klüngele, Schüngele un för ze Maggele bruch.

 

Der Manes selvs sök eigentlich mih e günstig Mammsellche för sing "Tante Emma Lade". Et Stina, sing Neech, soll aan ene Mann gebraht weede, dä jet aan de Föß hät. Un singe Lakai, der Leopold, stich fies der Hafer, hä hät ävver noch nie ene Spargel gestoche.

 

Wat ene spektakuläre Lottogewenn, die Eisbude vum Marie-Luise Leckerschlecker un ene Polka-Wettbewerb met däm amouröse Kuddelmuddel zo dun han, verzälle mer Üch en unsem raderdolle Histörche.

 

Met vill Musik un Danz weede mer zosamme erlevve, dat mer hüggzodags vür allem Eins bruche: E bessche Jux un Dollerei!